Dokumentasjon

Bunad- og folkedraktrådet skal bygge opp og forvalte arkiv med draktregistreringar og anna dokumentasjon knytt til folkedrakt og bunad.
På grunnlag av feltarbeid som har vore gjort i mange tiår og som stadig pågår, har vi bygd opp eit omfattande arkiv.

Draktregistreringane utgjer den største delen av arkivet. Ein del av det registrerte materialet er i museumseige, men størstedelen er i privat eige. Draktforsking i internasjonal samanheng har stort sett vore basert på museumstilfang, så eit slikt arkiv er unikt for Noreg.

Arkivet vårt omfattar også fotoarkiv, kjeldearkiv, stoffprøvearkiv, tekstilarkiv, saumforklaringsarkiv, arkiv etter privatpersonar og korrespondansearkiv. Vi har også ei stor samling av modellbunader. Folkedrakttradisjonane står i fokus i dokumentasjonsarbeidet, men det er også viktig for oss å dokumentere bunadhistoria.
Alt materialet er samla i vårt dokumentasjonssenter. Bruk av samlingane er gratis. Ønskjer du kopi av noko, kan det fåast mot vederlag (sjå prisliste). Vi inngår då ein skrifteleg avtale om bruk av materialet. Hovudregelen er at alt materiale er tilgjengeleg for publikum, men etter avtale med eigar kan enkelte ting klausulerast. Pr. d.d. held vi på å digitalisere samlingane, slik at dei skal bli lettare tilgjengeleg for deg som brukar.
Bunad- og folkedraktrådet tek også i mot materiale frå andre. Om du ønskjer å gje/oppbevare noko hjå Bunad- og folkedraktrådet, ta kontakt med seksjonsleiar Anne Kristin Moe.